الازدواجية منهج حياة

بسم الله و الحمد لله و الصلاة و السلام علي رسول الله

، للأسف أصبحت عندنا ازدواجية في كل حاجة تقريبا ، كل حاجة بقينا بنكيل بمكيالين فيها  مفيش حد عايز يستمر متسق مع نفسه و للأسف الإزدواجية دي جايبة الخراب مش للبلد بس لأ دي لشخصياتنا و تعاملنا مع بعض. و للأسف الواحد بقاله فترة التايم لاين بتاعه علي تويتر و فيس بوك  مفيهوش حاجة غير شتايم و اتهامات و اشاعات و تريقة و ازدواجية المعايير بقت عند كل الناس الا من رحم ربي و الأمثلة كثير جدا دي شوية حاجات منها

أنصار البرادعي و حمدين  يتضايقوا أوي لما حد يقولهم يا عبيد البرادعي والاخوان يتضايقوا لما يتقالهم يا خرفان المرشد رغم انهم بيتعاملوا مع بعض بنفس الازدواجية  في كل المواقف كل واحد مش راضيها  علي نفسه وراضيها علي غيره

الليبراليين و أنصار البرادعي و حمدين لما بيتشتموا من الاسلاميين يروحوا قايلين هو ده الإسلام اللي انتو عايزينه يا إسلاميين  ولما الاسلاميين يتشتموا من أنصار البرادعي و حمدين يروحوا قايلين هي دي حرية الرأي اللي انتم عايزينها يا بتوع الليبرالية ، برده كل واحد مش راضيها علي نفسه و راضيها علي غيره

التيار الاسلامي بشكل عام يتخنق و يتضايق جدا لما حد ينزل تريقة في تويتة و لا بوست و لا صورة علي حد من المشايخ و لا علي حازم أبو اسماعيل  ولا علي غيرهم من المنتمين للتيار الاسلامي  أما علي  الناحية التانية  فأول لما تنزل تريقة علي البرادعي و لا حمدين و لا غيرهم من التيار الليبرالي تلاقي الشير شغال علي ودنه و كأن التريقة  اصبحت حلال هنا  و نفس الازدواجية بتتكرر عند الليبراليين بالضبط

الإسلاميين ميحبوش باسم يوسف و هو بيتريق علي الشيوخ و برامجهم و مواقفهم و يشتموا و يعترضوا علي أي حد بيعمل شير للحلقة  لكن اول ما باسم يوسف عمل حلقة التريقة علي سي بي سي و المذيعين بتوعها الللي مبيحبوهمش تلاقي الشير برده زي الرز من الاسلاميين  بنفس الازدواجية في الفكر كأن السخرية من الناس بقت حلال دلوقتي

الليبراليين علي تويتر لما يتضربوا في الميدان  أو تتهدلهم منصة يعملولها مناحة علي تويتر و فيس بوك في حين إن عادي جدا إنهم يشوفوا حرق مقرات الإخوان أو اصابة و قتل أفرادهم بل و بعضهم كمان بيقي  سعيد به  و بيعمل شير للخبر

الاشاعات  كل الناس بتكرهها  علي نفسها و علي التيار بتاعها لكن الليبرالي ينشر أي اشاعة عن الاسلامي عادي بدون تثبت و لا تأكد و لا يرضي يسمع حتي رد من اللي بيتقال عليه الاشاعة و الاسلامي يعمل نفس النظام  بدون تثبت و لا تمهل و لا الهوا و طبعا الاشاعة بتطلع و هم الاثنين يردوا علي بعض و يستشهدوا  بآيات القرآن إن كل واحد فيهم فاسق بس بعد كده بيرجع كل واحد فيهم تاني لازدواجيته مع نفسه و يرجع ينشر اشاعات

دي كانت حبة أمثلة صغيرة لازدواجية المعايير اللي علي فكرة مش موجودة في السياسة بس دي موجودة عند ناس كتير في الدين و الأخلاق و في حاجات كتير قوي بس حبيت أوضحها في حاجة زي السياسة احنا عايشينها اليومين دول  بالذات وابتديت أحس انها بقت منهج حياة عندنا

  وبمناسبة  الازدواجية و الأحداث الأخيرة كده : حط كده البرادعي مكان مرسي  و اسأل نفسك لو انت معارض كنت حتفضل معارض و تنزل تتظاهر ؟ و لو انت مؤيد كنت حتفضل مؤيد ؟ و لا الدنيا حتتقلب ؟ و ساعتها  حتعرف الازدواجية دي عندك و لا لأ مش لازم تنشر الرد علي السؤال ده علي فيس بوك وتويتر و لا حاجة بس علي الأقل خليك واضح مع نفسك

 حاجة أخيرة أنا مقصدش  في اللي كتبته إن البني آدم مفروض يبقي بيحب كل التيارات  لأن كده ده بني آدم في ظني اما بينافق الكل أو مش فاهم حاجة ، طبيعي جدا يكون ليك انتماءك لتيار معين و تدافع عنه  و تؤيده و كل حاجة لكن الغرض من البوست ده هو انك تبقي عارف إنك لازم تقبل المعاملة بالمثل حتتريق علي الناس يبقي ما تعترضش لما يبهدلوك تريقة ، حتشتم هما كمان لسانهم طويل ، حتفرح فيهم هما كمان     مستنينلك علي الغلطة. فعامل الناس بما تحب أن يعاملوك به  و في نفس الوقت برضه خلي عندك مبادئ واضحة تحكم بيها علي المواقف علشان تفضل صادق علي الأقل قدام نفسك

ربنا يرزقنا الثبات علي الصراط المستقيم  حتي نلقاه و هو راض عنا

ما شاء الله

 من كام يوم أرسل لي  أحد أصدقائي ايميل بعنوان “ما شاء الله”  و فيه  لينك لفيديو علي يو تيوب لأحد الأشخاص ويدعي منصور خليل أحمد

  الفيديو كان ببساطة سبع دقائق تمثل كلمة لأحد الطلاب الخريجين لزملائه في حفلة تخرجه … أول لما الفيديو اتبعتلي افتكرته كان كاتب لي في الرسالة ما شاء الله علي أساس ان الراجل اللي بيتكلم هو مسلم  مثلا و متفوق في بلد أجنبي و قال كلام كويس بس بصراحة من أول ما بدأ في كلمته لزملاءه الخريجين و الدكاترة و أنا استغربت و كل لما الفيديو يمشي و نقترب من آخره بيزيد استغرابي أكثر و انبهاري بالمتكلم لحد لما الفيديو خلص و ساعتها فهمت ليه صديقي كتب لي ” ما شاء الله ” في عنوان الايميل

  الموضوع ببساطة هو انني حضرت أكثر من حفلة تخرج و شاهدت مقاطع من حفلات تخرج ناس كتيرة جوة و برة مصر لكن عمري ما شفت في ولا واحدة فيهم أي مسلم من اللي طلعوا اتكلموا فاهم دينه و معتز به وواثق فيه بالشكل اللي يخليه يكرس الكلمة بتاعته (اللي حيقولها قدام الجامعة كاملة بما فيها زملائه و أساتذته و ربما اولياء الأمور) انها تكون كلمة دعوية يستخرج مجملها من القرآن و من السنة بل و يقرأ القرآن بالتجويد و يشرحه للناس

فكرت كتير قوي لو انا كنت مكان الشاب ده و طلعت اقول كلمة و انا مترشح من دفعتي علشان أمثلها وكمان دفعتي كلها أجانب أصلا غير مسلمين يا تري كان حيجي في بالي انني أجيب سيرة الدين في الكلمة ؟ يا تري كنت  حستشهد بكلام الله عز و جل أو بمواقف من السنة ؟ يا تري كنت حقدر أقول آية قرآن واحدة ؟  ولا طبعا كنت  حأجري علي الانترنت علشان أدور علي كلام من بتاع الأدباء أو العلماء أو مديرين الشركات الكبيرة  أو .. أو علشان أقتبس منه و أحاول أبهر الناس به في الكلمة اللي بقولها

 اللي بهرني في الفيديو مش الكلام نفسه اللي بهرني هو

 أولا ان الشاب نفسه فكر أصلا انه يقول كلمة دعوية و سط الناس دي .. كثير مننا مش بس ما بيعملش لأ ده الموضوع ما بيجيش في دماغه أصلا ولا بيفكر فيه

ثانيا انه بعد ما فكر كسر كل حواجز التثبيط و العجز اللي كثير مننا بيقعوا فيها … كثير مننا لو جت في دماغه حاجة زي كده ، الشيطان حيطلعله مليون سبب انه ميعملهاش و يخوفه منها    زي ان الناس ممكن متتقبلش  أو زي انهم ممكن يعترضوا عليه أو زي انه ممكن الناس تتضايق منه أو زي ان الوقت مش مناسب أو ان الناس دي كثير منها ممكن يكون ميعرفش الاسلام أصلا أو… أو  … أعذار و حجج واهية كثيرة جدا

 ثالثا انه قال الكلام ده في مجتمع غير مسلم و مش بس كده لأ ده معظم الحضور شباب و مش بس كده لأ ده كمان في حفلة تخرجهم يعني في أكثر وقت  الناس دي محتاجة حاجة تكون هي   بتحب تسمعها وهو سبحان الله  رغم كل ده اختار كلام ربنا علشان ينتهزوجود الجمع الكبير ده في الدعوة

رابعا اني اتكسفت من نفسي و أنا بسمعه بيقرأ سورة العصر بالعافية و بيجاهد علشان تطلع بالتجويد و احنا اللي معانا اللسان العربي لا نقدر  نعمة الله علينا بل و قلما نستخدمها أصلا

  الحقيقة ان  الشاب ده نموذج من الرجال حقا الذين يحملون هم الدين و يسارعون في أي موقف يستطيعون فيه دعوة من حولهم  و هم فعلا الذين يقدرون أن القرآن هو حقا للعالمين و يثقون تمام الثقة أنه لا شئ يعلو في معانيه أو جماله علي القرآن من  كلام أدباء أو حكماء أو علماء علي مر العصور.  دي بعض الآيات التي تذكرتهاو اللي ربنا تحدث فيها عن القرآن وربنا  يجعلنا من أهل القرأن  الذين يقرأونه يعملون به و يدعون الناس له و عن طريقه

“لَقَدْ أَنزَلْنَا إِلَيْكُمْ كِتَاباً فِيهِ ذِكْرُكُمْ أَفَلَا تَعْقِلُونَ”

“وَكَذَلِكَ أَوْحَيْنَا إِلَيْكَ رُوحاً مِنْ أَمْرِنَا مَا كُنْتَ تَدْرِي مَا الْكِتَابُ وَلا الإِيمَانُ وَلَكِنْ جَعَلْنَاهُ نُوراً نَهْدِي بِهِ مَنْ نَشَاءُ مِنْ عِبَادِنَا وَإِنَّكَ لَتَهْدِي إِلَى صِرَاطٍ مُسْتَقِيمٍ”

“يَا أَيُّهَا النَّاسُ قَدْ جَاءَتْكُمْ مَوْعِظَةٌ مِنْ رَبِّكُمْ وَشِفَاءٌ لِمَا فِي الصُّدُورِ وَهُدًى وَرَحْمَةٌ لِلْمُؤْمِنِينَ”

“وَنُنَزِّلُ مِنَ الْقُرْآَنِ مَا هُوَ شِفَاءٌ وَرَحْمَةٌ لِلْمُؤْمِنِينَ”

آخر نصيحة رمضان باقي عليه أسبوع يا ريت نحسن استغلاله في القرآن و الدعوة علشان ربنا يستخدمنا فعلا ولا يستبدلنا بأمثال هؤلاء الرجال حقا

 ده اللينك بتاع  الفيديو للي عايز يتفرج عليه

http://www.youtube.com/watch?v=UoiOvyF8mEo