تجديد رخصة القيادة (سكان مصر الجديدة و مدينة نصر)

بسم الله و الحمد لله و الصلاة و السلام علي رسول الله

أنا كاتب البوست ده علشان أوفر البهدلة و المشاوير علي الناس قدر المستطاع اللي عايزة تجدد رخصة قيادة  بتاعتها و ساكنين في مدينة نصر أو مصر الجديدة

لو انت ساكن في مدينة مصر أو مصر الجديدة يبقي حتطلع الرخصة من مرور القطامية في التجمع الخامس بس قبل ما نروح التجمع  وتضرب المشوار لازم يكون معاك الآتي:

1) صور بطاقتك أربع نسخ (احتياطي)

2) صور الرخصة القديمة نسختين (احتياطي)

3) شهادة باطنة و نظر(ودول بتجيبهم من أي مستوظف خيري أو مستشفي بحوالي أربعين جنيه)

و ممكن يتم إستخراجها من مركز رابعة العدوية الطبى والشهادة الواحدة تكلفتها 30.00 جنيه مع توقيعها من الدكتور ومدير المركز وختمها بختم المركز واحد على الصورة الملصة بالشهادة وواحد على الشهادة بجوار توقيع مدير المركز

4) شهادة براءة الذمة من المخالفات (ودي بتجيبها من مدينة نصر من ادارة المرور اللي جنب مسجد رابعة العدوية)

5) 3 صور شخصية ( 2 منهم علي شهادة الباطنة و النظر) و الثالثة احتياطي

6)  رخصتك القديمة

– علشان تطلع  شهادة المخالفات من مرور مدينة نصر في رابعة حاول تروح من 9 الصبح و حتخلص في حوالي نص ساعة بالكثير إن شاء الله ومش محتاج غير صورة بطاقة و صورة الرخصة القديمة  + الرخصة القديمة نفسها + فلوس علشان لو عليك  غرامة و لو مفيش غرامة بتدفع 10 جنيه برضه 🙂

– تكاليف التجديد من مرور القطامية في التجمع حوالي 60 جنيه

– علي فكرة شهادة المخالفات بتبقي سارية لمدة 15 يوم يعنب ممكن تطلعها في يوم من مرور رابعة و بعدين تروح تكمل الاجراءات في مرور القطامية في يوم ثاني  (انا عملت كده شخصيا)

– نصيحة : حاول متروحش في يوم سبت علشان الزحمة و كذلك حاول تكون هناك من 9 الصبح

– المرور بتاع رابعة شباكه بتاع المخالفات بيقفل واحدة الظهر فخد بالك

ده ملخص سريع كده للحاجات لكل الحاجات اللي بتحتاجها قبل ما تروح  ولما تروح هناك المرور في القطامية حيقعد الظابط يقولك هاتلي ورقة من هنا وورقة من هناك بس علي الاقل مش حيرجعك تاني و حتخلص الاجراءات و تتصور و تخلص 🙂