بسم الله والحمد لله والصلاة والسلام على رسول الله
الحمد لله من حوالي شهر سافرت سنغافورة مع أختي و في رأيي المتواضع هي بالنسبة لي أجمل بكثير من دول زرتها و قعدت في بعضها بالاسابيع أو الشهور كمان زي ألمانيا و سويسرا و تركيا و دبي و شايف انها من أجمل المناطق للإستجمام و السياحة و لشهر العسل و الفسحة و كل حاجة. و يمكن أنا واحد من الناس اللي كان زمان دائماً نفسي أسافر في أماكن زي فرنسا و إيطاليا و و و عمر ما جه في دماغي موضوع سنغافورة ده بس بعد السفرية اللي فاتت أنا فعلاً نفسي اشارك الناس التجربة كلها و أنا واثق إن مفيش بني آدم حيروح هناك و مش حيتبسط. فاللي جي ده خلاصة عشر أيام هناك
لماذا سنغافورة ؟
في ظني إن ناس كثير حيسألوا ليه مش أمريكا أو أوروبا أو دبي أو أي دولة تانية حتى في آسيا و عندي شوية أسباب لكدة:
أولاً اللغة
و دي مش أكبر مشكلة بس فعلياً في دول مثلاً ماينفعش تروحها من غير فهم لغتها أو حتتعسف بشكل عام زي اليابان أو ألمانيا. الميزة في سنغافورة إن تقريباً الشعب كله بيتكلم إنجليزي … كل الناس بلا مبالغة بس بإختلاف مستواهم فيه فده حيسهل عليك التعامل جداً و أنت هناك. حاجة تانية كل اللائحات الإرشادية و العلامات و أسماء المحلات و المواصلات و حتى الإرشادات في كل مكان بتتقال الأول بالإنجليزي و بعدين بأي لغة ثانية
ثانياً الأكل
و ده مشكلة ناس كتير بتسافر انها ممكن تتعسف علشان تلاقي أكل حلال فراخ أو لحمة. و الموضوع ده محلول هناك تماما في سنغافورة و فيه محلات كتير جداً بتبيع أكل حلال. و المحلات دي مش نادرة ولا حاجة بالعكس دي موجودة تقريباً في أي “Food Court” حيقابلك و الجميل بقى لما حد بيقول لك حلال مش بيبقى الموضوع بالحب كده زي ما فيه أتراك كثير في ألمانيا بيبيعوا لحمة مش حلال و يضحك عليك و يقول لك حلال لأ لازم المحل هناك يكون “Certified” إنه حلال و معلق الشهادة دي كمان. و على فكرة معظم ال”Fast Food” هناك حلال زي “Macdonalds” مثلاً .
ثالثاً الشعب والعنصرية
للأسف كثير جداً من دول أوروبا دلوقتي بقى فيها موضوع القلق و العنصرية تجاه المسلمين و خاصةً لو أنت شخص ملتحي أو معاك أختك أو مراتك مثلاً محجبات. فده ممكن يكدر ناس كثير في سفرياتهم و يعرضهم لمضايقات. و دة برضه أحد مميزات سنغافورة و هو إن هما متعودين على شكل الحجاب و عندهم كمان مساجد كثيرة في كل مكان فموضوع السمت أو المظهر الإسلامي بشكل عام هما متقبلينه عادي عندهم. تقريباً ثلث سكان سنغافورة مسلمين بس برضه علشان الناس تكون فاهمة دة مش معناه انك حتمشي تلاقي البنات هناك محجبات كلها بالعكس تماماً لأنها بلد سياحي و حار كمان بس الفكرة انك حتلاقي محجبات و مش حتقلق من أي عنصرية في التعامل
رابعاً الأمان:
أعتقد أن البلد هناك أمان جداً سواء للسياح أو غيرهم. المحلات نفسها بتقفل على 9 أو 10 و فيه مطاعم بتسهر عن كده بس حتى و أنت ماشي مثلاً على الساعة 12 بالليل أو واحدة مفيش أي قلق مثلاً من حرامية أو ناس سكرانة زي في أوروبا. طبعاً كل حاجة هناك متراقبة كمان ب-CCTV في كل حتة تقريباً فده مخلي الموضوع أمان أكثر بس عامةً دي أحد المميزات بتاعتها كبلد عن بلاد تانية ماتعرفش تمشي فيها بعد 7 و 8 بالليل.
معلومات عامة مهمة
أولاً بالنسبة للvisa محتاج تتأكد أنها double entry مش single entry و الموضوع ده مش حيفرق معك غير في حاجة واحدة و هي إن الdouble entry visa حتسمحلك تاخد أتوبيس و تروح تزور ماليزيا و ترجع تاني سنغافورة لكن لو single entry و حاولت تخرج تزور ماليزيا (بما إن ماليزيا ما لهاش visa للمصريين) مش حتعرف ترجع سنغافورة تاني لإنك بالفعل استخدمت الvisa بتاعتك مرة و أنت جي من مصر
ثانياً بالنسبة للطيران – مفيش طيران مباشر لهناك لإن ال singaporian airlines وقفوا الرحلات لمصر من ٣٠ سبتمبر ٢٠١٤ و ده link لو حد حابب يتأكد. وأنا مسافر كان ممكن أنزل ترانزيت تبع الخطوط القطرية في الدوحة أو تبع الامراتية في دبي و تقريباً مدة السفر واحدة بس كانت في الامراتية وقتها أقل في الترانزيت فطلعت معاهم – مدة السفر كله تقريباً ١٣ ساعة ممكن يزيدوا على حسب الترانزيت – من مصر لدبي حوالي أربع ساعات و من دبي لهناك حوالي سبع ساعات و نص مثلاً و ساعة ترانزيت. تكلفة التذكرة round trip كانت حوالي ٥ الاف جنيه للفرد و أنا أعتقد السعر ممكن يكون أرخص لو الناس حجزت من بدري . أنا كنت بحجز قبلها باسبوعين بس فكنت متأخر.
ثالثاً بالنسبة للجو هناك اعمل حسابك أن الجو إستوائي يعني صيفي تقريباً طول السنة و نسبة الرطوبة هناك عالية جداً بس برضه اللي بيلطف الجو شوية هو موضوع المطر اللي بينزل على طول. فاعمل حسابك في لبس صيفي و شمسية أو ممكن تجيب الشمسية من هناك موجودين في أي سوبر ماركت هناك 🙂
رابعاً توقيت سنغافورة سابقنا ب-٦ ساعات فحاول تسافر من مصر مثلاً على ٥ أو 6 مساءً علشان توصل هناك تاني يوم على 1 ظهراً (بسبب فرق التوقيت) و هو ده تقريباً ميعاد الcheck-in في أغلب الفندق هناك
سادساً موضوع المواصلات : طول رحلتك تقريباً مش حتحتاج تركب حاجة تقريباً غير المترو في أغلب الأحيان و إحتمال أتوبيس أو تاكسي في أوقات ضئيلة جداً. المترو هناك إسمه MRT و هو تقريباً مغطي المدينة كلها من أول مطار (Changi) لمعظم الأماكن تقريباً خاصةً الأماكن السياحية و هما كمان قاعدين يكبروا في شبكة المترو علشان توصل لكل مكان تقريباً حتى أطراف المدينة.
ده لينك بتاع خريطة الMRT هناك علشان تبقى عارف أنت بعيد أو قريب قد إيه من المكان.و لو عملت hover كمان على أي محطة حتعرف إيه الأماكن المشهورة القريبة من المحطة دي و ممكن تختار محطتين و هو حيحسبلك التذكرة بكام بالظبط للفرد .على فكرة مفيش مترو هناك بيتأخر عن 5 دقائق تقريباً بينه و بين اللي بعده
حتلاقي هناك حاجة اسمها tourist pass ده بتلاقيه في المحطات الكبيرة هو مفروض ميزته إنه لو هوه معاك هو بيسمحلك انك تركب المترو أو الأتوبيس أي عدد من المرات و لأي مكان لمدة 3 أيام في مقابل 10 دولار في اليوم الفكرة إنك ممكن تحس في الأول انك كده حتوفر فلوس مواصلات بس الحقيقة إن في الغالب انك يومياً مش حتحتاج تركب مترو أو اتوبيسات بأكثر من 6 أو 7 دولار رايح راجع و ممكن أقل كمان فالأحسن انك تشتري التذكره العادية من ماكينة التذاكر و حاول تخلي معاك شوية فكة علشان المكان مبيقبلش فلوس كبيرة . فيه معلومة مهمة برضه أنك متقطعش التذكرة لإنك ممكن تستخدمها لحد 6 مرات و كل مرة بس بتاخد التذكرة و تشحنها في الماكينة و كل مرة بتستخدم فيها التذكرة بترخص
التاكسي هناك غالي و خاصةً بالليل أو في أوقات الذروة فحاول تتفاداه قدر المستطاع و كمان لو احتجت تاكسي بتروح حتة اسمها (Taxi Stand) و هو أي تاكسي فاضي معدي ملزم إنه يركبك. فيه برضه mobile application ممكن تطلب بيه تاكسي و فيه كمان uber هناك لو احتاجت
سابعاً فترة الزيارة لو أنت جي مخصوص سنغافورة علشان تزورها فحاول متخليش الرحلة تكون أقل من 10 أيام و لو أنت مثلاً حتزور أكثر من دولة و من ضمنهم سنغافورة فمتهيألي ممكن تزور أهم الحاجات في 3 أو 4 أيام
Abousafy's Blog 