سنغافورة – الجزء الثاني

بسم الله والحمد لله والصلاة والسلام على رسول الله

طب تكملة للمقال الأول سنغافورة دولة صغيرة بس فيها حاجات كثيرة جداً تتعمل … أنا حبدأ بشوية تنبيهات عامة و بعدين حشرح الأماكن اللي ممكن تزار و المعلومات المهمة و بعدين حكتب جدول مقترح للرحلة

 شوية نقاط عامة لكل الأماكن السياحية في سنغافورة

• فيه website لتقريباً كل مكان سياحي عندهم فدائماً افتحه قبل ما تروح حيقولك المواعيد بتاعت المكان والتفاصيل و سعر التذاكر و كل حاجة
• فيه خريطة توضيحية لكل مكان حتروحه عند مكان حجز التذاكر فاسأل عليها و ممكن كمان تسأل الناس اللي بيبيعوا التذاكر
• فيه محطة مترو قريبة من كل مكان سياحي تقريباً في سنغافورة
• في كل مكان حتروحه بعد ما تخلصه حتلاقي دايماً محل بيبيع souvenirs  خاصة بالمكان ده.
• متنساش الكاميرا و أنت رايح في أي مكان حتى لو مبتحبش التصوير صدقني حتحبه  🙂
• متنساش كمان الشمسية علشان ممكن تمطر في أي لحظة جامد جداً و أنت في أي مكان
• تقريباً أي مكان حتروحه حيكون عنده food court فمتقلقش من الأكل 🙂

أولاً الناس اللي بتحب الحيوانات و الأسماك و الطيور لازم تروحوا خمس أماكن، أربع أماكن كلهم في نفس المكان والخامس في مكان ثاني (جزيرة Sentosa)

1. Singapore Zoo http://www.zoo.com.sg
2. Singapore Night Safari http://www.nightsafari.com.sg
3.  Singapore River Safari http://www.riversafari.com.sg
4. Singapore Birds Park  http://www.birdpark.com.sg
5. Sentosa Island Aquarium

شوية نقاط مهمة :

• طيب مبدئياً بالنسبة للأربع أماكن عمرك محتعرف تروح اكثر من مكانين في نفس اليوم و يمكن كمان متلحقش تخلص المكانين علشان الحاجات في كل Park كثيرة جداً و خاصةً لو معاك أطفال أو لو بتحب الحيوانات حتقضي وقت طويل فيهم.
• لو حتدخل أكثر من Park في نفس اليوم إشتري لهم تذكرة واحدة حتكون أوفر لك
• لو معندكش وقت تروح الأربعة أو الخمسة فرأيي River Safari و Zoo هما أحسن حاجات و حتخليك تشوف كل حاجة تقريباً
• أنصحك متفوتش ال River Safari  بالذات علشان فيها الباندا و سنغافورة كلها مفيهاش غير إثنين Pandas و عايشين هناك في ال river safari و اسمهم KAI KAI و JIA JIA 🙂
• فيه في كل Park مواعيد لعروض أو لأوقات معينة تأكل فيها حيوانات. كل ده برضه موجود على الموقع بتاعهم
• تقريباً في ثلاثة من الأربعة Parks فيه “Tram Ride” و أحياناً بتكون ليها رسوم زيادة على التذكرة. فكرة الموضوع ده إنه بيأخذك في جولة بحاجة زي الطفطف كده بيلففك الPark كلها و أنت راكب و أحياناً بتلاقي يا إما مرشد كده بيشرحلك أو تسجيل بتسمعه. ميزتها انها مش متعبة بس عيبها حاجتين أولاً مبتعديش على كل حاجة في ال Park و مابتشفهاش حتى من قريب و ثانياً بتضيعلك وقتك  لو أخدتها و بعدين حبيت تمشي على رجلك و عمرك ما حتستمتع زي ما بتكون ماشي على رجلك.
• الأسعار بتتغير كل شوية و بتفرق أنت معاك أطفال صغيرة ولا لأ  و حتدخل Park ولا أكثر من Park و حتاخد الجولة بال-Tram ولا لأ فبرضه إرجع للموقع و راجع كل حاجة

ثانياً الناس اللي بتحب الحدائق و النباتات و المناظر الطبيعية ففيه مكانين ماينفعش يفوتوكم

1. Botanic Gardens https://www.sbg.org.sg
2. Gardens by the Bay http://www.gardensbythebay.com.sg

الBotanic Gardens بجد كبيرة جداً و رائعة بشكل يفوق الوصف فيها كمية أنواع من النباتات  مش طبيعية و هي هناك عاملة زي الحدائق العامة فبتدخلها ببلاش و ممكن تجيب أكل و شرب و تاكل براحتك و أنت قاعد مع أسرتك أو أصحابك. هي كبيرة جداً و فيها كمان زي مسرح صغير كده فيه عروض.

  Gardens By the Bay  دخولها عامةً مجاناً برضه بس مش بنفس مساحة ال Botanic Gardens و فيها حاجات مختلفة و برضه رائعة أولاً فيه حاجتين Flower Dome و Cloud Forest والإثنين زي مبنيان كبار فيهم نباتات عمرك ما حتشوفها في حياتك أصلاً من كل أنحاء العالم و دول بتدفع لهم رسوم علشان تدخلهم. ثانياً فيها مكان لزم تروحه و تشوفه بالليل إسمه OCBC Skyway و هو زي ممر عالي كدة بتطلعله و بتشوف مناظر جميلة . حول تعرف العرض عند ال-OCBC Skyway امتى و روح في الوقت ده.

فيه عرض هناك كده عامل زي ال-“Dancing Fountain”  بس بالضوء بدل من المية و ده مدته 30 دقيقة تقريباً و بيكون بالليل أعتقد 7 أو 8

ثالثاً الناس اللي بتحب المرتفعات و عايزة تاخد سلفي و كده فيه ثلاث أماكن أرشحهملكم

1. Singapore Flyer http://www.singaporeflyer.com
2. Marina Bays Sand Sky Park http://www.marinabaysands.com/sands-skypark.html
3. Cable Car – Sentosa Island

ال Flyer دي جامدة جداً حتفرجك على سنغافورة من فوق و تقريباً بتاخد 30 دقيقة في اللفة بتاعتها و هما كمان بيراعوا ان الناس اللي فيها ميكونوش مزحمين خالص  علشان يعرفو يتبسطوا و يتصوروا مش محتاج تعرف حاجة أنت بس حتروح و تجرب على طول. أقرب محطة ليها هي محطة

بالنسبة لMarina Bays Sand Sky Park هو علشان تكون فاهم و مجمع الدنيا

• Marina Bay Sands ده فندق كبير جداً و من أغلى فنادق سنغافورة
• الفندق بيطل على Gardens By the Bay على طول و على Singapore Flyer  فالمنظر من فوق خطير
• الفندق من تحت فيه shopping mall كبير جداً و فيه تقريباً كل الماركات العالمية اللي تعرفها و اللي متعرفهاش
• الدور الأخير في الفندق ده فيه Infinity Pool  مشهور قوي و كان صور فيه ديفيد بيكهام  قبل كدة و بتاع بس مسموح الدخول فيه لنزلاء الفندق فقط
• الدور القبل الأخير هو ده إسمه ال Observation Deck اللي بتدفعله فلوس علشان تشوف سنغافورة من فوق و مسموحلك تقعد فوق و تتصور براحتك و هو ده اللي بنتكلم عنه

أعتقد Marina Bay Sands أعلى من ال Flyer بس التصوير من الFlyer أسهل و أجمل

ال Cable Cars دي أحد الحاجات الجميلة اللي ممكن تركبها في جزيرة Sentosa و بما انها مش موجودة في مصر  فحتكون ممتعة كأول مرة. أنت بتحجزها من عند نفس المكان اللي حتحجز عنده تذاكر Universal Studios وال-Aquariam و كده

رابعاً الناس اللي بتحب تهرج و تلعب و تكب rides و كده  بصراحة Sentosa Island هي المكان المثالي لكده

• حتلاقي جواها Univseral Studios و دي محتاجة يوم لوحدها
• فيه كمان SEA Aquarium كبير هناك
• برضه في زي Aqua Park و Beach و Pool و حاجات كثيرة جداً
• فيها برضه معالم مهمة عندهم زي Merlion و Tiger Tower
• لو معاك أطفال لازم تروح Sentosa مرتين على الأقل علشان حيتهبلوا هناك

خامساً  الناس اللي بتحب التسوق و عايزة تخربها هناك فيه أماكن كثيرة جداً فيها محلات بس فيه ثلاث أماكن رئيسية في الموضوع ده

•  Orchard Road http://www.orchardroad.org و الشوارع المحيطة به
• Vivo City http://www.vivocity.com.sg
• Shoppes in Marina Bay Sands http://www.marinabaysands.com/shopping.html

إستعد بقى للمشي كثير جداً في الثلاثة دول، محلات بالهبل و كمية ماركات مش طبيعية فربنا يكون في عون أي رجل مراته بتحب الShopping بزيادة لأن طريقة عرض الحاجات مبهرة و نظيفة جداً الصراحة

 أخيراً بعض الأماكن المتنوعة اللي لازم تعدي عليها

•   Grand Mosque of Singapore(Sultan Mosque) http://sultanmosque.sg : و ده أكبر مسجد هناك و جانبه شارع إسمه شارع العرب حتلاقي فيه souvenirs  شرقي و تركي و مطاعم أكل شرقي و كده
• China Town http://www.chinatown.sg : و هنا حتلاقي التسوق الرخيص شوية وال souvenirs الرخيصة بشكل عام . خد بالك بس من فلوسك و أنت ماشي في china town علشان ممكن تتنشل . حتلاقي عامةً يافطة كبيرة مكتوبة على أول شارع China Town انك تحترس النشل 🙂 لو ليك برضه في جو المعابد و كده حتلاقي كذا واحد
• Clarke Quay http://www.clarkequay.com.sg/en :  ده مكان تروحه بالليل عامل زي النيل كده. قعدة على النهر و مطاعم و هو ظريف انك تريح هناك فآخر اليوم فيه ناحية منه كويسة و فيه ناحية تانية فيها مطاعم وبارات كثيرة ابعد عنها دي 🙂

يمكن يكون عامةً فيه أماكن تانية و الواحد مشفهاش بس دي الحاجات اللي لو شفتها تبقى غطيت معالم سنغافورة تقريباً

آخر حاجة ده جدول بسيط كده اقترحه لأي حد رايح هناك 10 أيام

• اليوم الأول :  Singapore River Safari + Singapore Birds Park
• اليوم الثاني: Singapore Flyer(morning)  + Walk by the Bay on Dragon Fly Bridge + Gardens by the Bay
• اليوم الثالث:  Singapore Zoo + Singapore Night Safari
• اليوم الرابع:  Marina Bays Sand Sky Park + Shopping in the Marina Bays Park Mall
• اليوم الخامس: (Sentosa Island (Universal Studios + SEA Aquarium + Singapore Merlion
• اليوم السادس: Orchard Road
• اليوم السابع:  Botanic  Gardens (morning) +  Clarke Quay
• اليوم الثامن: Grand Mosque of Singapore + Arab Street + Bugis Junction for Shopping
• اليوم التاسع:  China Town + Vivocity
•  اليوم العاشر: لو معاك فيزا double entry حاول تروح ماليزيا و ترجع

يا رب يكون البوست مفيد للناس المسافرة أو اللي عايزة تسافر عامةً

جزاكم الله خيراً